फिल्म ‘क्रलिङ क्रोज: आँखा’लाई अमेरिकामा दुई प्रतिष्ठित रेमी अवार्ड

काठमाडौं। जौन योञ्जनद्वारा निर्देशित नेपाली फिल्म ‘क्रलिङ क्रोज: आँखा’ले संयुक्त राज्य अमेरिकामा आयोजना भएको वर्ल्डफेस्ट–ह्युस्टन इन्टरनेसनल फिल्म फेस्टिभलमा दुई प्रतिष्ठित ‘रेमी अवार्ड’ जित्दै ऐतिहासिक सफलता हात पारेको छ। हालै आयोजक कमिटीले इमेलमार्फत फिल्मले दुई विधामा अवार्ड जितेको आधिकारिक जानकारी गराएको हो।

यस फिल्मले ‘विदेशी फिचर’ (Foreign Features) विधामा उत्कृष्ट हुँदै ‘प्लेटिनम रेमी अवार्ड’ र ‘निर्देशन–क्राफ्ट’ (Directing – Craft Category) विधामा ‘गोल्ड अवार्ड’ जितेको छ।

विश्वभरका फिल्म निर्माता र सिर्जनाहरूलाई एकै ठाउँमा ल्याउने यो महोत्सव अमेरिकाको टेक्सासस्थित ह्युस्टनमा आयोजना भएको हो। सन् १९६१ मा स्थापना भएको ह्युस्टन इन्टरनेसनल फिल्म फेस्टिभल विश्वकै सबैभन्दा पुरानो स्वतन्त्र फिल्म महोत्सवमध्ये एक मानिन्छ।

स्टिभन स्पिलबर्ग, जर्ज लुकास, डेभिड लिन्च र आङ ली जस्ता दिग्गज हलिउड निर्देशकहरूले पनि आफ्नो करियरको सुरुवातमा यही महोत्सवबाट रेमी अवार्ड प्राप्त गरेका थिए। यस्तो विश्वप्रसिद्ध मञ्चमा नेपाली फिल्म र यसका निर्देशकले ‘प्लेटिनम’ र ‘गोल्ड’ जस्ता सर्वोच्च अवार्ड जित्नुले नेपाली फिल्मलाई सम्मानित विश्वव्यापी प्लेटफर्ममा अब्बल साबित गरेको छ।

यसअघि यस फिल्मले ६२औँ संस्करणको एसिया प्यासिफिक फिल्म फेस्टिभलमा ‘उत्कृष्ट फिल्म’को उपाधि जितेर इतिहास रचिसकेको छ। उक्त महोत्सवको सर्वोच्च सम्मान प्राप्त गर्ने यो नै पहिलो नेपाली फिल्म हो। एसियामा ऐतिहासिक जित र अमेरिकामा प्रतिष्ठित दुई रेमी अवार्ड प्राप्तिसँगै ‘आँखा’ले नेपालको उदाउँदो फिल्म उद्योगतर्फ विश्वको ध्यान गम्भीर रूपमा आकर्षित गर्न सफल भएको छ।

निर्देशक योञ्जनले प्राप्त गरिरहेको यस अन्तर्राष्ट्रिय मान्यताले ‘नेपाली कथाहरूले विश्वव्यापी दर्शकहरूको मन छुन सक्छन्’ भन्ने कुरा स्पष्ट रूपमा प्रमाणित गरेको छ। फिल्म समीक्षकहरूका अनुसार यो सफलताले नेपाली फिल्म निर्माणको प्राविधिक तथा कथा वाचनको बढ्दो शक्ति र राष्ट्रिय सीमाभन्दा बाहिरका दर्शकसम्म पुग्न सक्ने क्षमतालाई उजागर गरेको छ।

सुकुम्वासी बस्तीमा जीवनयापन गरिरहेका सामान्य मानिसहरूको कथा, सङ्घर्ष र यथार्थलाई गहिरो र मार्मिक रूपमा चित्रण गरेको यस फिल्ममा स्मिता लामिछाने, पशुपति राई, निशा अधिकारी, आरके मेहता, विजय बराल, बुद्धि तामाङ लगायत कलाकारहरूको जीवन्त अभिनय रहेको छ।

यो जितसँगै ‘क्रलिङ क्रोज: आँखा’ले नेपाली फिल्म क्षेत्रको शिर अन्तर्राष्ट्रिय स्तरमा थप उच्च बनाएको छ।