विश्व सिनेमा घुमेकी गीताञ्जली थापाको ‘जार’बाट नेपाली फिल्ममा डेब्यु : प्रिमियर पछि झन प्रसंसा

काठमाण्डौँ । नेपाली फिल्म ‘जार’ मा देखिएकी अभिनेत्री गीताञ्जली थापा धेरैका लागि नौलो नाम हो। नेपाली फिल्म क्षेत्रमा उनको परिचय नयाँ भए पनि, उनी अभिनयको यात्रामा निकै पर पुगेकी कलाकार हुन् — विश्वका कैयन फिल्म फेस्टिभलमा उनको कामले दर्शकको मन जितिसकेको छ।

सिक्किममा जन्मेकी गीताञ्जली थापा अहिले नेपाली फिल्मप्रेमीका आँखामा नयाँ पात्र जस्तै देखिएकी छिन्। तर उनी त्यस्ती कलाकार हुन्, जसले भारतमा अभिनयका सबैभन्दा प्रतिष्ठित मानिने ‘राष्ट्रिय फिल्म पुरस्कार’ जितिसकेकी छिन्। सन् २०१३ मा रिलिज भएको फिल्म ‘Liar’s Dice’ मा उनले निभाएको भूमिकाले उनलाई यो अवार्ड दिलायो। यो फिल्म भारतको तर्फबाट ८७औं एकेडेमी अवार्ड्समा समेत पठाइएको थियो।

गीताञ्जलीको अभिनय यात्राले भारतभित्र मात्र नभएर अन्तर्राष्ट्रिय स्तरमा समेत आफ्नो प्रभाव जमाइसकेको छ। टोरन्टो, बुसान, न्युयोर्क र लस एन्जलसजस्ता प्रतिष्ठित फिल्म फेस्टिभलमा उनका सिनेमाहरू स्क्रिनिङ भइसकेका छन्। उनी अभिनित सिनेमाहरूले विश्वभरका दर्शकलाई छोएका छन्।

उनको नाम डिजिटल दुनियाँमा पनि निकै चिनिएको छ। नेटफ्लिक्सको चर्चित वेब सिरिज ‘Sacred Games ’ मा उनको उपस्थिति देख्न सकिन्छ। यसले उनलाई फरक विधा र फरक दर्शकसम्म पुर्‍याएको छ।

अब, यिनै गीताञ्जली थापा नेपाली  फिल्म ‘जार’ मार्फत नेपाली मूल दर्शकमाझ आइपुगेकी छिन्। सन् १८ सयको दशकमा  लेखक इन्द्रबहादुर राईको ऐतिहासिक कथाबाट बनेको योफिल्ममा उनको अभिनयले कथामा एक प्रकारको गहिराइ थपेको देखिन्छ।

निर्देशक फुर्वा छिरिङ लामाको निर्देशनमा बनेको यो फिल्ममा सौगात मल्ल र अनुपविक्रम शाहीसँगै उनले स्क्रीन सेयर गरेकी छिन्। ‘जार’ सामाजिक संरचना, प्रेम, पीडा र यथार्थताको कथा हो — र यही कथा गीताञ्जली जस्तो गहिरो कलाकारमार्फत अझ विश्वसनीय बनेको छ।

‘जार’ हेरेका दर्शकले गीताञ्जलीको अभिनयको तारिफ नगरी बस्न सकेनन्। सिक्किममा सम्पन्न ग्राण्ड वर्ल्ड प्रिमियरपछि स्थानीय दर्शकहरू भावुक देखिए, धेरैले फिल्मले इतिहासलाई छोएको महसुस गरे। त्यहाँ पनि गीताञ्जली थापा एउटा सशक्त उपस्थिति बनिन्।

नेपाली सिनेमा अहिले अन्तर्राष्ट्रिय मापदण्डमा सोच्ने मोडमा आइपुगेको छ। यस्तो मोडमा गीताञ्जली थापा जस्तो कलाकारको आगमन केवल एउटा भूमिकाको लागि नभएर एक संकेत हो — अब नेपाली सिनेमा सीमित भेग र सीमित अनुहारभित्र सीमित रहँदैन।

गीताञ्जली थापा ‘जार’ मार्फत नेपाली पर्दामा त भर्खर देखिएकी हुन्, तर उनले ल्याएको अभिनयको गहिराइ, अनुभव र शालीन उपस्थिति लामो समयसम्म नेपाली दर्शकमाझ बसिरहनेछ। ‘जार’ फिल्मले गीताञ्जलीलाई नेपाली सिने जगतमा चिन्नको लागि एउटा सशक्त सुरुवात त बनाएको छ नै, आगामी दिनमा उनले थप गहिरा र विविध पात्रमार्फत नेपाली पर्दामा आफ्नो उपस्थिति बलियो बनाउन् भन्ने अपेक्षा राख्न सकिन्छ।