क्राइम थ्रिलर ‘मास्टर्नी’को ट्रेलर सार्वजनिक, भदौ ५ देखि प्रदर्शन

काठमाडौं । आयंका फिल्म्सको प्रस्तुतिमा बनेको पहिलो फिल्म ‘मास्टर्नी’को ट्रेलर सार्वजनिक गरिएको छ। यसअघि सार्वजनिक पोस्टर र टिजरले फिल्मको कथावस्तुबारे केही संकेत दिएका थिए। ट्रेलरले भने आमा–छोरीबीचको भावनात्मक सम्बन्ध र छोरीको सुरक्षाका लागि आमाले गर्न सक्ने संघर्षलाई अझ स्पष्ट रूपमा प्रस्तुत गरेको छ।

क्राइम थ्रिलर तथा फ्यामिली ड्रामा जनरामा बनेको फिल्मको ट्रेलरमा प्रमुख कलाकारहरूलाई प्राथमिकता दिइएको छ। ट्रेलरमा प्रियंका कार्की जोशी, सिम्रन खड्का, दीपकराज गिरी, दीपाश्री निरौला, सन्दीप क्षेत्री, प्रमोद अग्रहरी, ऋचा शर्मा, आर्यन सिग्देल, दिनेश काफ्ले र रक्षा थापालगायत कलाकारको अभिनय देख्न सकिन्छ।
ट्रेलरमा राजेन्द्र मोक्तानको कलर ग्रेडिङ तथा मुकेश शाहको ध्वनि मिश्रण रहेको छ।

सुवेन्दु घोष निर्देशित फिल्मलाई प्रियंका कार्की जोशी, आयुष्मान जोशी, क्याबिनेट श्रेष्ठ र प्रनित कार्कीले संयुक्त रूपमा निर्माण गरेका हुन्। सुरक्षा सिंह मल्होत्रा र सिमोस सुनुवार कार्यकारी निर्माता रहेका छन्। भारतीय प्राविधिक टोलीको समेत संलग्नता रहेको फिल्मको पोस्ट–प्रोडक्सनको काम नेपाल र भारतमा भइरहेको छ।

फिल्मको कथा प्रियंका कार्कीले लेखेकी हुन् भने पटकथा शान बस्नेतले तयार पारेका छन्। संवाद लेखनमा पनि प्रियंका कार्की र शान बस्नेतको सहकार्य रहेको छ।
युवराज इन्दोरियाको छायांकन, राजा सिंह सिदुको सम्पादन, रोहित शाक्यको संगीत तथा त्रिशाला गुरुङको स्वर रहेको फिल्म आगामी भदौ ५ गतेदेखि प्रदर्शनमा आउनेछ।

फिल्मको पोस्टर डिजाइन तथा पब्लिसिटी ट्राइडेन्ट कन्सेप्ट टिमले गरेको हो भने नेपालमा आरआर फिल्म्सले वितरण गर्नेछ।