सोलो रिलिज हुँदै ‘राम नाम सत्य’, दिव्या भन्छिन्– ‘फिल्म गज्जब बनेको छ’

काठमाडौं । नयाँ वर्षको छेको पारेर आगामी चैत्र २७ गते प्रदर्शनमा आउने फिल्म ‘राम नाम सत्य’ सोलो रिलिज हुने भएको छ। सो मितिमा प्रदर्शनको तयारीमा रहेका अन्य नेपाली फिल्म पोस्टपोन्ड भएपछि निर्देशक माइकल चन्दको फिल्मले एक्लै प्रदर्शनको अवसर पाएको हो।

फिल्ममा समावेश ‘धागोले बाटेको, हुम्लाको लिमी’ बोलको गीत दर्शकमाझ चर्चामा छ भने टिजरले पनि सकारात्मक प्रतिक्रिया पाइरहेको छ।

फिल्ममा विराज भट्ट, सुशील श्रेष्ठ, सुपुष्पा भट्ट, दिव्या रायमाझी, आयुष सिंह ठकुरी, खुशी कार्की, सुनिल थापा, प्रशान्त ताम्राकार, दिनेश डीसी लगायत कलाकारको अभिनय रहेको छ।

अभिनेत्री दिव्या रायमाझीले फिल्मप्रति आफ्नो उत्साह व्यक्त गर्दै आफूले यसअघिको भन्दा फरक शैलीमा काम गरेको बताएकी छन्। उनका अनुसार फिल्ममा आफूले आधुनिक राजकुमारीको भूमिका निर्वाह गरेकी छन्।

उनले फिल्ममा एक्सनसँगै इमोशन, सस्पेन्स र प्रेमको संयोजन रहेको उल्लेख गर्दै दर्शकलाई पूर्ण मनोरञ्जन दिने विश्वास व्यक्त गरिन्। “मैले मेरो फिल्म भनेर भनेको होइन, फिल्म वास्तवमै राम्रो बनेको छ,” उनले भनिन्।

फिल्ममा दिव्या र सुशील श्रेष्ठको जोडी देखिनेछ। सुशीलसँग काम गर्न सहज भएको उनले बताएकी छन्।

माइकल चन्दकै पटकथा तथा संवाद रहेको फिल्ममा उपेन्द्र शाही र स्वेता बिमलीको लगानी रहेको छ।