नेपालगञ्जमा ‘माइतीघर’को सातै शो हाउसफुल

काठमाडौं। बडादशैँको फूलपातीका दिनदेखि प्रदर्शनमा आएको नेपाली फिल्म ‘माइतीघर’ले उत्कृष्ट प्रदर्शनलाई निरन्तरता दिएको छ । दशैंपछि फिल्मको व्यवसायले आक्रमक रुप धारण गरेको छ।

यसैबीच, मंगलवार यो फिल्मले नेपालगञ्जमा बम्पर व्यापार गरेको छ। त्यहाँको सिने रोयल सिनेमा हलमा मंगलवार ‘माइतीघर’का सात वटै शो हाउसफुल भएका छन्।

सोमवार साँझ कलाकारहरुसहित नेपालगञ्ज पुगेका निर्माता रोहित अधिकारीका अनुसार आज सिनेमा हल पुगेका दर्शकहरूले टिकट नै पाएका छैनन्।

काठमाडौंबाट गएका फिल्मका कलाकारहरु केदारप्रसाद घिमिरे, धीरज मगर, उपासना सिंह ठकुरी, श्यामाश्री शेर्पा, शिशिर वाङदेल, निर्माता रोहित अधिकारी तथा निर्देशक मिलन तामाङलाई स्थानीय दर्शकहरूले भव्य स्वागत गरेका छन्। दर्शकहरूले कलाकारहरुलाई खुला हृदयले स्वागत गर्दै फिल्मको मज्जा लिइरहेका छन्।

नेपालगञ्जकै क्यूएफएक्स बागेश्वरीमा पनि यो फिल्मले दर्शकको उत्कृष्ट साथ पाइरहेको निर्माता अधिकारीको भनाइ छ।

उनका अनुसार, आज यो फिल्मले देशभर नै उत्कृष्ट व्यापार गरिरहेको छ। बलियो वर्ड अफ माउथका कारण फिल्मको व्यापार सुखद रुपमा अगाडि बढिरहेको छ। तर निर्माणपक्षले हालसम्म व्यापारिक आँकडा सार्वजनिक गरेको छैन।

मिलन तामाङको निर्देशनमा तयार भएको यस फिल्ममा केदारप्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, बुद्धि तामाङ र शिशिर वाङदेललगायतका कलाकारहरूको अभिनय रहेको छ।