‘लालीबजार’ तयार, अन्तर्राष्ट्रिय वितरण अधिकार बिक्री गर्दै षट्कोण आर्ट्स

काठमाडौं । आगामी वैशाख १८ गते प्रदर्शनमा आउने फिल्म ‘लालीबजार’ को सम्पूर्ण प्राविधिक काम सम्पन्न भएको छ । फिल्म तयार भएसँगै निर्माण कम्पनी षट्कोण आर्ट्सले यसको अन्तर्राष्ट्रिय वितरण अधिकार बिक्री गर्ने घोषणा गरेको छ ।

फिल्ममा समावेश गीत ‘मायालाई के दिउँ म बैना’ लोकप्रिय भएसँगै विदेश अधिकार खरिदका लागि विभिन्न प्रस्ताव आइरहे पनि निर्माण पक्षले प्राविधिक रूपमा फिल्म तयार भएपछि मात्र प्रदर्शन अधिकार बिक्री गर्ने निर्णय गरेको हो ।

षट्कोण आर्ट्सद्वारा निर्मित फिल्महरूले डायस्पोरा बजारमा राम्रो व्यापार गर्दै आएको र वितरकलाई मुनाफा दिलाउँदै आएको दाबी गरिँदै आएको छ । यही कारण ‘लालीबजार’ का लागि पनि विभिन्न अन्तर्राष्ट्रिय प्रस्तावहरू आएको जनाइएको छ ।

निर्माण कम्पनीका अनुसार फिल्म तीन साताअघि नै प्रदर्शनका लागि तयार भइसकेको थियो । तर प्राविधिक काम अधुरो हुँदा वितरकलाई समस्या नहोस् भन्ने उद्देश्यले पूर्ण तयारीपछि मात्र अधिकार बिक्री प्रक्रिया अघि बढाइएको हो ।

फिल्मका निर्माता म्याक्स दीपेश खत्रीले अब विदेश प्रदर्शनलाई लक्षित गर्दै वितरण सम्झौतामा अगाडि बढ्ने तयारी भइरहेको बताए । उनका अनुसार आएका प्रस्तावहरूबारे निर्माण टिमभित्र छलफल गरी अधिकार बिक्री गरिनेछ ।

निर्माता खत्रीका अनुसार ‘मायालाई के दिउँ म बैना’ गीतको लोकप्रियतासँगै फिल्मको माग विदेशमा पनि बढेको छ । गत फागुन २९ मा सार्वजनिक गीतले एक महिनाभित्रै युट्युबमा एक करोड १५ लाखभन्दा बढी भ्युज पाइसकेको छ भने टिकटकमा हजारौँ भिडियो बनिसकेका छन् ।

फिल्मका लेखक तथा निर्देशक यम थापाले नेपाली फिल्ममा कम देखिएको कथालाई प्रस्तुत गर्न खोजिएको बताए । उनले मनोरञ्जनसँगै सामाजिक सन्देश बोकेको फिल्म रहेको दाबी गरेका छन् ।

बर्दियाको राजापुरमा छायांकन गरिएको फिल्ममा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे, आशा पौडेल, गोविन्द सुनार, आभा अर्याल, तारा शर्मा, रमेश वादी, सरस्वती अधिकारी, जानकी कठायत, निश्चल पन्थी र विरवल चौधरीलगायत कलाकारको अभिनय रहेको छ । यसै फिल्ममार्फत विशाल देवकोटा र प्रशंसा सुवेदीले डेब्यु गरेका छन् ।

फिल्मको कथा तथा निर्देशन यम थापाको रहेको छ भने पटकथा र संवाद यम थापा र प्रदीप भट्टराईले संयुक्त रूपमा तयार गरेका हुन् । फिल्ममा कार्यकारी निर्माता प्रदीप भट्टराई रहेका छन् भने म्याक्स दीपेश खत्री र रवीन्द्रसिंह बानियाँ निर्माता हुन् ।

फिल्ममा क्रिएटिभ निर्देशक जेबी रुवाली, द्वन्द्व निर्देशक सम्राट बस्नेत, छायांकन निर्देशक सुशन प्रजापती, सम्पादक मित्रदेव गुरुङलगायतको प्राविधिक टिम रहेको छ ।