फिल्म ‘कमला मिस’को छायांकन सम्पन्न

काठमाडौं । वरिष्ठ कलाकार तथा निर्देशक निर शाहको निर्देशनमा निर्माण भइरहेको फिल्म ‘कमला मिस’को छायांकन सम्पन्न भएको छ।

निर्माण पक्षका अनुसार फागुन १ गतेदेखि सुरु गरिएको यस फिल्मको सम्पूर्ण सुटिङ मंगलबार सकिएको हो। लाइन प्रोड्युसर पुष्कर लामा (प्रेम भोम्जन)का अनुसार फिल्मको छायांकन करिब २३ दिनमा पूरा गरिएको हो। बीचमा निर्वाचनका कारण तीन दिन छायांकन स्थगित भए पनि निर्धारित तालिकाभित्रै काम सम्पन्न गरिएको उनले बताए।

मनोवैज्ञानिक कथावस्तुमा आधारित ‘कमला मिस’मा निर्देशक निर शाहसहित रमेश बुढाथोकी, बासना तिमिल्सिना, शिवम सराफ क्षेत्री, आरभ दाहाल, भावना मगर, सुशान्तकुमार श्रेष्ठ, जयन्त रेग्मी, सुरेश थापा, राजन केसी र संजय खतिवडा लगायत कलाकारहरूको मुख्य भूमिका रहेको छ।

फिल्म विजय मल्ल स्मृति प्रतिष्ठानका लागि उमा मल्लले निर्माण गर्नुभएको हो। यसका कार्यकारी निर्माता उमेश मल्ल र चैतन्य प्रधान हुन् भने लाइन प्रोड्युसर पुष्कर लामा (प्रेम भोम्जन) रहेका छन्। फिल्मको कथा विजय मल्लको हो। पटकथा तथा संवाद निर्देशक निर शाह र प्रजल दुलालले संयुक्त रूपमा तयार पारेका हुन्।

फिल्ममा शिवराम श्रेष्ठको छायांकन, युग भुसालको संगीत तथा रामजी लामिछानेको कोरियोग्राफी रहेको छ। निर्माण व्यवस्थापन भोला सुबेदीको रहेको भने सगर बोहरा फिल्मका मुख्य सहायक निर्देशक हुन्।

करिब दस वर्षपछि निर्देशनमा फर्किएका निर शाह नेपाली फिल्म क्षेत्रमा लामो समयदेखि सक्रिय छन्। उनले यसअघि ‘वासुदेव’, ‘पच्चीस वसन्त’, ‘राजमती’, ‘वसन्ती’, ‘मसान’ र ‘सेतोबाघ’ जस्ता चर्चित फिल्म निर्देशन गरिसकेका छन्।