रघुजी फिल्म्सको ‘कालकट्टी’मा नयाँ कलाकारको खोजी

काठमाडौँ । रघुजी फिल्म्सको ब्यानरमा निर्माण घोषणा गरिएको फिल्म ‘कालकट्टी’ का लागि कलाकार अडिसन खुला गरिएको छ। रघुनाथ सापकोटाको लगानीमा निर्माण हुन लागेको यस फिल्मको लेखन तथा निर्देशन अमरदीप सापकोटाले गर्नेछन्। निर्माण टिमका अनुसार फिल्म चैत्रको पहिलो साता छायांकनमा जाने तयारीमा रहेको छ।

फिल्मका लागि २० देखि २६ वर्ष उमेर समूहकी एक जना सेकेन्ड लिड अभिनेत्री, एक जना बालक र दुई जना बालिका आवश्यक रहेको जनाइएको छ। त्यस्तै २५ देखि ३० वर्ष उमेर समूहका तीन जना पुरुष कलाकार पनि अडिसनमार्फत चयन गरिने निर्माण पक्षले जानकारी दिएको छ। अडिसनमा सहभागी हुन चाहनेले आफ्नो बायोडाटा सहित निर्माण कम्पनीको जिमेल filmsraghujee@gmail.com मा विवरण पठाउन सकिनेछ। आवेदन पठाउँदा हालसालै खिचिएको फोटो, हाइट र वेटको स्पष्ट विवरण, अभिनय गरेको अनुभव भए सोसम्बन्धी भिडियो, सर्ट फिल्म वा फिल्मका लिंकहरू अनिवार्य रूपमा समावेश गर्नुपर्नेछ। छनोट भएका उम्मेदवारहरूलाई अडिसनको मिति र स्थान सम्बन्धी जानकारी इमेलमार्फत गराइनेछ।

लेखक तथा निर्देशक अमरदीप सापकोटा र सञ्चारकर्मी तथा निर्माता रघुनाथ सापकोटाको सहकार्यमा बन्न लागेको यस फिल्मले नेपाली फिल्म क्षेत्रमा नयाँ सोच, नयाँ ऊर्जा र फरक प्रस्तुतिका साथ दर्शकमाझ आउने अपेक्षा निर्माण टिमले गरेको छ। फिल्म आगामी वर्ष २०८३ भित्र प्रदर्शनमा ल्याउने लक्ष्य राखिएको छ।

फिल्मको छायांकन निसाल पौडेलले गर्नेछन् भने संगीत भीम बिष्टले दिनेछन्। आरआर फिल्म्सले देशव्यापी वितरण गर्नेछ भने डिजिटल अधिकार ओएसआर डिजिटलसँग सुरक्षित गरिएको निर्माण पक्षले जनाएको छ।