राजनीतिक विकृति र जनआवाजको कथा बोकेको ‘बिगुल’को ट्रेलर सार्वजनिक

काठमाडौं । नेपाली समाजको यथार्थ, राजनीतिक विकृति र अन्यायविरुद्ध उठ्ने जनआवाजलाई केन्द्रमा राखेर निर्माण गरिएको फिल्म ‘बिगुल’को ट्रेलर आइतबार सार्वजनिक गरिएको छ।

रमेश कोइरालाको निर्देशनमा बनेको करिब तीन मिनेट लामो ट्रेलरमा राजनीतिक खिचातानी, सामाजिक न्याय, पारिवारिक उल्झन, पुस्ताबीचको वैचारिक मतभेद र निमुखा जनतामाथि राजनीतिक नेतृत्वले गर्दै आएको खेलबाडलाई प्रभावकारी रूपमा प्रस्तुत गरिएको छ।

देश र जनतालाई पटक–पटक धोका दिँदै आएको राजनीतिक नेतृत्वविरुद्ध आवाज उठाउने नयाँ पुस्ताको संघर्षलाई केन्द्रमा राखिएको ‘बिगुल’ले दर्शकमाझ सशक्त सन्देश दिने संकेत ट्रेलरमार्फत देखाएको छ। देशमा आसन्न आम निर्वाचनको सन्दर्भमा फिल्मले उठान गरेका विषयवस्तुले सही नेतृत्व चयनतर्फ जनमानसलाई सचेत गराउने अपेक्षा गरिएको छ।

ट्रेलरमा अभिनेत्री बेनीशा हमाल, अभिनेता नरेन खड्का र विनोद न्यौपानेले युवा पुस्ताको भावना सशक्त रूपमा अभिव्यक्त गरेका छन्। दिनेश कोइरालाको कथा तथा निर्माण रहेको फिल्ममा कल्पना पौडेलको प्रस्तुति छ भने सूर्यकान्त कोइराला र महेश कोइराला सहनिर्माताका रूपमा रहेका छन्।

फिल्ममा बेनीशा हमाल, नरेन खड्का, विनोद न्यौपाने, सरोज खनाल, रमेश बुढाथोकी, नीर शाह, हेमन्त बुढाथोकी, शिशिर वाङ्गेल, जेएन घिमिरे, गीता अधिकारी र मानश्री शर्माको अभिनय रहेको छ। रविन्द्र खड्का विशेष भूमिकामा देखिएका छन् भने मिरा पण्डितले नायिकाका रूपमा डेब्यु गरेकी छन्।

माघ ९ गतेदेखि देशभर प्रदर्शनमा आउने ‘बिगुल’को छायांकन शिव ढकालले गरेका हुन्। तारा थापा ‘किम्भे’ले सम्पादन गरेको फिल्मका गीतमा कांग्रेस महामन्त्री विश्वप्रकाश शर्मा, अर्जुन पोखरेल र मनोज चौलागाईंको संगीत रहेको छ।

फस्टलुक पोस्टर, टिजर र गीत सार्वजनिक भएसँगै चर्चामा रहेको ‘बिगुल’ले मनोरञ्जनसँगै समाज र देशप्रति आम नेपालीलाई सचेत र सजग बनाउने विश्वास निर्देशक कोइरालाले व्यक्त गरेका छन्।