News Filmy Newsportal / Nepal
काठमाडौं। नेपालमा लगातार ५१ दिन प्रदर्शनको ऐतिहासिक सफलता मनाएको फिल्म ‘होस्टेल’ फ्रेन्चाइज को तेस्रो भाग ‘होस्टेल ३’ ले भारतमा पनि सोही सफलता दोहोर्याएको छ । यसले गर्दा भारतीय नेपाली समुदायबिच नेपाली फिल्मको लोकप्रियता विस्तार भएको छ ।
भारतका वितरक सुरज खड्का ले दिएको जानकारी अनुसार, सेप्टेम्बर ५ देखि दार्जिलिङस्थित एसभिएफ सिनेमा, रिंक मलमा निरन्तर प्रदर्शन भइरहेको यो फिल्मले त्यहाँ पनि ५१ दिन पूरा गरेको छ ।
भारतमा ‘होस्टेल ३’ को वितरण गोर्खा फिल्म प्रोडक्सन र सुपर सिनेमा ले गरेका हुन् । फिल्म सिक्किम, दार्जिलिङ, सिलगुडीसहित ५० भन्दा बढी हलमा एकैसाथ प्रदर्शन गरिएको थियो ।
निर्देशक सशान कँडेल ले ठूलो फ्रेन्चाइजलाई विश्वास गरी निर्माण इजाजत दिने दुर्गिश फिल्म्ससहित निर्माण, वितरण र प्रचार प्रसारमा सहभागी सबैलाई आभार व्यक्त गरे ।
‘होस्टेल ३’ ले क्याम्पस जीवनका उतारचढाव, प्रेम, मित्रता र सङ्घर्षको कथा चित्रण गर्दै युवापुस्तामाझ विशेष चर्चा पाएको छ ।
फिल्ममा पारस बम ठकुरी (कुलब्वाय), रिहान गिरी, पदम तामाङ, सिम्रन पन्त, हेना नगरकोटी लगायत कलाकारहरूको अभिनय रहेको छ ।
बक्स अफिसमा सफल व्यापारसँगै ‘होस्टेल ३’ हाल नेपालकै अग्रणी ओटीटी प्लेटफर्म ‘सिनेमाघर एप’ मा पनि स्ट्रिमिङ भइरहेको छ । दर्शकहरूले गुगल प्ले स्टोर, एप स्टोरसहित विभिन्न स्मार्ट टिभीका माध्यमबाट यो फिल्म हेर्न सक्नेछन् ।
